বেংগালুৰু পদপিষ্টঃ নিহত পৰিয়ালৰ ক্ষতিপূৰণ বৃদ্ধি

বেংগালুৰুত IPL খিতাপ জয়ৰ আনন্দত পৰিপূর্ণ হৈ পৰিছিল চিন্নাস্বামী ষ্টেডিয়াম। ৰয়েল চেলেঞ্জাৰ্ছ বেংগালুৰু (RCB)-ৰ এই ঐতিহাসিক বিজয়ৰ উদযাপন উপলক্ষে আয়োজন কৰা হৈছিল এক বৃহৎ অনুষ্ঠান। কিন্তু আনন্দৰ এই মুহূৰ্ত মুহূৰ্তৰ ভিতৰতে পৰিণত হৈছিল এক ভয়াৱহ শোকাৱহ ঘটনাত। উদযাপন অনুষ্ঠানত উপস্থিত হোৱা বিপুল সংখ্যক অনুৰাগীৰ ভিৰত সংঘটিত হৈছিল পদপিষ্টৰ ভয়ংকৰ ঘটনা। এই ঘটনাত প্ৰাণ হেৰুৱাইছিল ১১ জন অনুৰাগীয়ে আৰু আহত হৈছিল প্ৰায় ৫০ জন লোক।

দেশজুৰি চাঞ্চল্য সৃষ্টিকৰী এই ঘটনাই কেবল বেংগালুৰুৰ নহয়, সমগ্ৰ ভাৰতৰ ক্রীড়া জগতক স্তম্ভিত কৰিছিল। IPL ইতিহাসত প্ৰথমবাৰৰ বাবে খিতাপ জয় কৰা আৰচিবিৰ আনন্দ দুখত পৰিণত হৈছিল। এই দুঃখজনক ঘটনাৰ বাবে কৰ্ণাটক চৰকাৰে ইতিমধ্যে আৰচিবি আৰু অনুষ্ঠান আয়োজনকাৰী ইভেণ্ট মেনেজমেণ্ট কোম্পানীক জগৰীয়া কৰিছে। তদন্ত প্ৰক্ৰিয়াও বৰ্তমান অব্যাহত আছে।

এই পৰিস্থিতিৰ মাজতে, ৰয়েল চেলেঞ্জাৰ্ছ বেংগালুৰুে নিহত অনুৰাগীসকলৰ পৰিয়ালক সহায়ৰ হাত আগবঢ়াবলৈ এক গুৰুত্বপূর্ণ সিদ্ধান্ত গ্ৰহণ কৰিছে। পূৰ্বে দলটোৱে প্ৰতিজন নিহতৰ পৰিয়াললৈ ১০ লাখ টকাকৈ ক্ষতিপূৰণ ঘোষণা কৰিছিল। কিন্তু আজি আৰচিবিয়ে এই ধনৰাশি বৃদ্ধি কৰি প্ৰতিজন নিহতৰ পৰিয়ালক ২৫ লাখ টকাকৈ ক্ষতিপূৰণ প্ৰদান কৰা হ’ব বুলি ঘোষণা কৰিছে।

আৰচিবিয়ে নিজৰ অফিচিয়েল ছ’চিয়েল মিডিয়া একাউণ্টত পোষ্ট কৰি কয় — “যোৱা ৪ জুনত সংঘটিত এই ভয়ংকৰ ঘটনাই আমাক গভীৰভাৱে শোকাহত কৰিছে। নিহত ১১ জন অনুৰাগীহে আমাৰ বাবে কেবল অনুৰাগী নহয়, তেওঁলোকে আৰচিবি পৰিয়ালৰ অবিচ্ছেদ্য অংশ। তেওঁলোক সদায়ে আমাৰ স্মৃতিত অম্লান হৈ থাকিব।”

ফ্ৰাঞ্চাইজিটোৱে আৰু কয় যে, কোনো সহায়ই নিহতসকলৰ পৰিয়ালত সৃষ্ট শূন্যতা পূৰণ কৰিব নোৱাৰে। তথাপি তেওঁলোকৰ প্ৰতি সন্মান আৰু কৃতজ্ঞতা স্বৰূপে ২৫ লাখ টকাকৈ সহায় প্ৰদান কৰা হৈছে। এই সিদ্ধান্তক আৰচিবিয়ে “RCB Care Initiative”-ৰ অংশ হিচাপে অভিহিত কৰিছে।

ঘটনা সন্দৰ্ভত দেশৰ বিভিন্ন প্ৰান্তৰ পৰা অনুৰাগীসকলে শোক প্ৰকাশ কৰিছে। ৰাজনৈতিক নেতা, ক্ৰীড়া জগতৰ ব্যক্তিত্ব আৰু ভক্তসকলে আৰচিবিৰ এই সিদ্ধান্তক স্বাগত জনাইছে। বহুতৰ মতে, যি পৰিয়ালৰ পুত্ৰ-কন্যা বা নিকটীয়জন প্ৰাণ হেৰুৱাইছে, সেই ক্ষতিপূৰণে সেই ক্ষতি পূৰণ কৰিব নোৱাৰে, তথাপি এই সহায়ে সামান্য হলেও তেওঁলোকৰ জীৱনযাত্ৰাত সহায় হ’ব।

ইতিহাস গঢ়ি IPL খিতাপ জয় কৰা আৰচিবিৰ বিজয় উদযাপন আনন্দৰ পৰিৱৰ্তে শোকৰ পৰিৱেশৰ সৃষ্টি কৰিলে। কিন্তু দলটোৰ ক্ষতিপূৰণ বৃদ্ধি কৰাৰ সিদ্ধান্তে এই দুঃখজনক ঘটনাৰ প্ৰতি দায়িত্বশীলতা আৰু মানবিকতা প্ৰকাশ কৰিছে।